मेसी यसै साता बाबु बन्ने

विश्व फुटबलमा सनसनी मच्चाइरहेका अर्जेन्टिनी सुपरस्टार लियोनेल मेसी यसै साता पहिलो पटक बाबु बन्ने तयारीमा रहेको स्पेनिस सञ्चार माध्यमले जनाएका छन् । समाचारमा जनाइएअनुसार मेसीकी गर्भवती प्रेमिका एन्टोनेला रोकुजोलाई सुत्केरी हुनका लागि चिकित्सकहरुले यसै साताको समय दिएका छन् ।

मेसीकी प्रेमिकाको गर्भमा रहेको बच्चा छोरा भएको यसअघि नै पक्का भइसकेको छ र बच्चाको नाम थियागो राखिइसकेको छ । गतसाता नै वच्चा जन्मने अपेक्षा गरिएको थियो । प्रेमिकाको सुत्केरी हुने समयका लागि बार्सिलोनाले मेसीलाई यो सप्ताहन्तमा आराम दिने सञ्चार माध्यमले जनाएका छन् । ‘शनिबार डेपोर्टिभो ला कोरुनाविरुद्धको खेल मेसीका लागि ऐतिहासिक हुनसक्छ । किनकी त्यो खेलमा उनी पुत्रलाभको अपेक्षामा मैदानबाहिर हुने सम्भावना छ । मेसी स्वयमले पनि उनको परिवार नयाँ सदस्यको आगमनमा खुसी मनाउन बार्सिलोना आउँदै गरेको पुष्टि गरिसकेका छन् ।’