कांग्रेस-एमालेले लिखित प्रस्ताव दिने
ललितपुरको सुनाकोठी गाविस ठेचोस्थित एक
घरमा शुक्रबार बसेको प्रमुख तीन दल र मधेसी मोर्चाको बैठकमा एमाओवादी
अध्यक्ष पुष्पकमल दाहाल प्रचण्डले कांग्रेस-एमालेसँग प्रधानमन्त्रीको
उम्मेदवार माग्नु भएको हो । कांग्रेस एमालेले संविधानसभाको निर्वाचनका लागि
सहमतिको सरकार बन्नु पर्ने अडान लिएपछि प्रचण्डले प्रधानमन्त्रीको
उम्मेदवारसहित सहमतिको प्रस्ताव माग्नु भएको हो । ‘हामीले वर्तमान सरकारलाई
सहमतिको स्वरुप दिन सक्दैनौं । सहमतिको सरकार बन्नुपर्छ भन्यौं’ एमाले
नेता भीम रावलले अनलाइनखबरसँग भन्नुभयो-’प्रचण्डजीले त्यसो भए
प्रधानमन्त्रीको उम्मेदवार दिनुस भन्नुभएको छ ।’
यसअघि पनि सहमतिको प्रस्ताव पेश गरेको भन्दै नेता रावलले छिट्टै उम्मेदवारसहित लिखित प्रस्ताव पेश गर्ने बताउनु भयो ।
दलहरू बैशाखमा चुवान गर्न र प्रत्यक्षतर्फ
२ सय ४० सिट कायम राख्न दलहरू सहमत छन् । संविधान संशोधन प्रकृया,
समानुपातिकतर्फको सिट संख्या र सरकारको नेतृत्वबारे भने दलहरूबीच विवाद छ ।
माओवादीले नयाँ चुनावमा जाने भए आफ्नै
नेतृत्वको सरकार हुनुपर्ने बताउँदै आएको छ भने कांग्रेस र एमालेले कांग्रेस
नेतृत्वमा सहमतीय सरकार हुनुपर्ने अडान राख्दै आएका छन् । प्रचण्डले
प्रधानमन्त्रीका लागि नाम माग्नुको अर्थ कांग्रेस नेतृत्वको सरकार मानेको
अर्थमा बिपक्षी दलहरुले बुझेका छन् ।
गठवन्धनका उम्मेदवार भट्टराई नै
माओवादीले प्रधानमन्त्रीका लागि आफ्नो
दावी भने छाडिसकेको छैन् । बैठकमा प्रचण्डले माओवादी र संयुक्त
लोकतान्त्रिक मधेसी मोर्चाको तर्फबाट वर्तमान प्रधानमन्त्री डा. बाबुराम
भट्टराईकै नेतृत्वमा सहमतिको सरकार बनाउने प्रस्ताव दोर्याउनु भएको छ ।
यस्तै गतिरोध अन्त्यका लागि प्रचण्डले
पूरानै तीनबुँदे प्रस्ताव अघि सार्नु भएको माओवादी स्रोतले जानकारी दियो ।
संविधानसभा पुनःस्थापनालाई पहिलो प्राथमिकता दिइएको प्रचण्डको प्रस्तावलाई
कांग्रेस-एमालेले यसअघि नै अस्वीकार गरेका छन् ।
चार दलका शीर्ष नेताहरुले यसअघि आजै बिहान राष्ट्रपति रामबरण यादवसँग भेट गरि छिटै सहमति गर्ने प्रतिबद्धता जनाएका थिए ।
