लस एन्जल्स (एजेन्सी),
कार्तिक २७ – जब गायक जस्टिन बिबर ‘बेबी’ गीतमार्फत चर्चामा आए, उनले धेरै
डाइहार्ट युवती फ्यान पनि कमाए । तिनै फ्यान बिबरका लागि कतिसम्म हानिकारक
रह्यो भने जब उनले नायिका सेलेना गोमेजसँगको आफ्नो सम्बन्धलाई सार्वजनिक
गरे, आफ्नी प्रेमिकालाई ज्यान मार्ने धम्की नै आए । युवतीका हटकेक बिबर
सेलेनासँग जोडिएको लेडिज फ्यानलाई स्वीकार गर्न गाह्रै पर्यो । ठूलो
चुनौतीका बाबजुद पनि डेटिङमा रमाइरहेको जस्टिन-सेलेनाको जोडी झन्डै दुई
वर्षपछि अलग्गिएको छ ।
‘यी दुईको गत साता नै ब्रेकअप भएको हो ।
विगत एक वर्षदेखि नै उनीहरूलाई सम्बन्ध जोगाइराख्न दुवैको व्यस्त सेड्युअल
बाधक बनिरहेको थियो’ एक पत्रिकाले स्रोत उद्धृत गर्दै लेखेको छ । तर दुवै
एकअर्काले विगतमा गरेका साझेदारीलाई भने विश्वासकै आधारमा बाहिर नल्याउने
पक्षमा रहेको पनि बताइएको छ । यतिबेला जस्टिन आफ्नो पछिल्लो एल्बमको
प्रमोसनमा व्यस्त छन् भने सेलेना पनि नयाँ फिल्मको सुटिङमा व्यस्त छिन् ।
१८ वषर्ीय गायक यतिबेला मोडल बारबरा पाल्भिनसँग नजिकिएका खबरहरू सार्वजनिक
भएका छन् भने सेलेनाले पनि आफ्नै फिल्मका को-स्टार ग्रेग सुल्किनसँग दोस्ती
बढाएको बुझिएको छ ।
सुल्किनले हालै सेलेनासँग रमाइलो गरिरहेका
फोटाहरू पोस्ट गरेका थिए । पछिल्लो गीत ‘इफ आइ वाज योर ब्वायफ्रेन्ड…’
लिएर आएका जस्टिनले एक महिनाअघि नै आफ्ना फोटोहरू पोस्ट गर्दै ‘सिंगल’ भनेर
स्टाटस राखेका थिए । यसले पनि दुईको ब्रेकअपको तयारी केही महिनाअघि नै
सुरु भएको देखिन्छ । प्रायः सेलेनासँगै सार्वजनिक हुने बिबर पछिल्लो ‘बिलिभ
टुर’ मा एक्लै छन् । उनले ट्वीटरमा पनि आफ्ना पाल्तु जनावरसँगै रमाइरहेका
फोटोहरू राख्न थालेपछि जोडीका बारेमा चियोचर्चो सुरु भएको थियो । सम्बन्ध
टुटेको समाचार आएपछि भने जस्टिनका फ्यान खुसी देखिएका छन् ।
