नवलपरासी, कात्तिक १७ । पुर्ब राजा
ज्ञानेन्द्र शाह नवलपरासी जाने भएका छन् । आगामी कार्तिक २१ गते बिश्व
हिन्दु महासंघ भारतको निमन्त्रणमा पुर्ब राजा शाह नवलपरासीको हरपुरको
गोपालपुरमा निमार्ण भएको गोरखनाथ मन्दिरमा मुर्ति स्थापना र धार्मीक यज्ञमा
सहभागी हुन जाने भएका हुन् । आयोजक संस्था बिश्व हिन्दु महासंघले
कार्यक्रमको तयारी बारे जानकारी गराउने उदेश्यले नवलपरासीको परासीमा
शुक्रबार आयोजीत पत्रकार सम्मेलनमा नेपाल र भारतको धार्मिक सम्बन्ध भएकाले
पुर्ब राजा शाह समेत यस धार्मिक कार्यक्रममा सरिक हुन आउने कार्यक्रम रहेको
तयारी समितीका संयोजक किशोरी महतोले बताएका छन् । उक्त दिन गुरु आदीत्यनाथ
योगी र पुर्ब राजा एकै पुजा मण्डपमा रहने बताइएको छ ।
गोरक्षपीठका
उत्तराधिकारी योगी आदीत्यनाथ को संयोजकत्वमा हुन गईरहेको यस धार्मिक
कार्यक्रमले नेपाल र भारतीय बिच धार्मिक सम्बन्ध , धार्मिक एकता एवंम
सांस्कृतिक सहिष्णुतालाई अझै प्रगाढ बनाउने भएकाले यस धार्मिक कार्यमा
पुर्ब राजा सहभागी हुन लागेको पत्रकार सम्मेलनमा संचार संयोजक एवंम् बिश्व
हिन्दु महासंघकी केन्द्रिय सदस्य अस्मीता भण्डारीले बताउनुभयो । २१ गते
मगंलबार दिनको १ बजे पुर्ब राजाले गोपालपुरमा निमार्ण भएको गोरखनाथ
मन्दिरमा मुर्ति स्थापना गर्ने साथै केही समय सम्बोधन समेत गर्ने कार्यक्रम
तयार भएको पत्रकार सम्मेलनमा तयारी समितीका संयोजक किशोरी महतोले बताएका
छन् । बिश्व हिन्दु महांसघको आयोजनामा आउँदो शनिबार देखी कार्तिक २४
गतेसम्म गोपालपुरमा बिबिध धार्मिक कार्यक्रम हुँदैछ । सो क्रममा करिब २
करोडको लागतमा निमार्ण सम्पन्न भएको गोरखनाथ मन्दिरमा मुर्ति स्थापना र
सप्ताह महायज्ञ हुने बताइएको छ ।
