१० पुस, काठमाडौं । सत्ता साझेदार दलहरुको
गठबन्धन सङ्घीय लोकतान्त्रिक गणतान्त्रिक गठबन्धनले राष्ट्रिय सहमतिको
सरकार गठनका लागि अधिकतम प्रयास गर्ने भएको छ ।
एकीकृत नेकपा माओवादीका अध्यक्ष पुष्पकमल
दाहाल प्रचण्डको निवास लाजिम्पाटमा मंगलबार बसेको गठबन्धन सचिवालय बैठकले
राष्ट्रिय सहमतिको सरकार गठनका लागि लचकता अपनाउने र त्यसो हुन
नसके
संविधानसभा पुनःस्थापना गरेर अगाडि जाने निष्कर्ष निकालेको प्रवक्ता
प्रेमबहादुर सिंहले जानकारी दिनुभयो ।
गठबन्धनले पटक पटक राष्ट्रिय सहमतिको
सरकार गठनका लागि प्रयास गरे पनि विपक्षी काँग्रेस र एमाले आफ्नै अडान
राखेर देशलाई सङ्कटतर्फ धकेलेको समेत निष्कर्ष निकालेको उहाँले जानकारी
दिनुभयो । विघटित संविधानसभाले पारित गरेका विषयलाई लिपिबद्ध गर्न त्यसको
पुनःस्थापना गर्नुपर्ने आवश्यकता झन् बढ्दै गएको गठबन्धनले ठहर गरेको
प्रवक्ता सिंहले बताउनुभयो ।
गठबन्धन सचिवालय बैठकले पूर्ण बैठकका लागि
कार्यसूची मात्रै तय गरेको छ । ”राष्ट्रिय सहमतिको सरकार गठनलगायत विषयमा
गठबन्धन सचिवालय बैठकले एजेन्डा तय गरेको र आज तयार भएको एजेन्डा गठबन्धनको
पूर्ण बैठकमा राखिन्छ र सोही बैठकबाट पारित गरिन्छ ।” प्रवक्ता सिंहले
भन्नुभयो । रासस
