भारत भ्रमणका बेला पुस १३ गते शुक्रबार दिल्लीमा आयोजित अन्तरराष्ट्रिय
मैथिली नाट्य महोत्सवमा भाषण गर्ने क्रममा डा. यादवले आफ्नो भाषा खिचडीजस्तो भएको गुनासो पोख्नुभएको हो । थोरै मैथिली र धेरै नेपालीमा बोल्नुभएका राष्ट्रपतिले वीचवीचमा अंग्रेजीसमेत घुसाउनुभएको थियो ।
राष्ट्रपति यादवलाई दिल्लीमा मैथिली भाषाको नाटक देखाउन जनकपुरबाट २१ जनाको कलाकार टोली भोकै र तिर्खै रेलको बाटोबाट दिल्ली पुगेको थियो । तर, राष्ट्रपति यादवले कार्यक्रममा भन्नुभयो- ‘जनकपुरको नाटक रहेछ, म उतै हेरौंला ।’
कुनै पनि कार्यक्रममा बोल्न थालेपछि मनका कुरा खुलस्थ पार्ने प्रष्ट वक्ता यादवले आफू खासमा बनारस आएको तर, राष्ट्रप्रमुख भएकाले सोहीक्रममा दिल्ली आउनुपरेको र नेताहरुसित भेटघाट गरिएको बताउनुभएको थियो । राष्ट्रपतिले नेपाल-भारतवीचको सम्बन्धबारे चर्चा गर्दै गंगाको पानीको ठूलो अंश नेपालीको पनि भएको बताउनुभयो । त्यसैगरी गौतम बुद्धले नेपालमा जन्मेर भारतको गयामा ज्ञान प्राप्त गरेको र जनकपुरमा जन्मेकी सीताले भारतका रामसँग विवाह गरेको राष्ट्रपतिले बताउनुभएको थियो ।
कार्यक्रममा दिल्लीस्थित नेपाली दुताबासका कर्मचारी पनि सहभागी थिए । केही नेपाली कलाकारलाई प्रवेश पास नभएको भन्दै निकैबेर प्रहरीले गेटमा रोकेर भित्र प्रवेश गर्न नदिएको गुनासो पनि नेपाली कलाकारले गरेका छन् । राष्ट्रपति यादवले नेपाली टोलीको नाटक नहेरे पनि महोत्सवमा मञ्चित ७ नाटकमध्ये नेपाली टोलीको नाटकलाई भारतीयहरुले रुचाएको दाबी कलाकारले गरेका छन् ।
