५ माघ, खोटाङ । स्थानीय डन समूहले खोटाङको महुरे-फोक्सिङटार सडक निर्माणमा संलग्न कामदारबाट रकम उठाएर लगेका छन् ।
डन समूहले सो सडकखण्ड अन्तर्गत बतासे
गाविसको भँडारेघाटमा काम गरिरहेका १ सय २० जना कामदारको सात लाख १५ हजार
रुपैयाँ रकम आफ्नै हातबाट उठाएर लगेको निर्माण उपभोक्ता समितिले जानकारी
दिएको छ ।
दिक्तेलस्थित राष्ट्रिय वाणिज्य बैंकबाट
रकम निकासा गरेलगत्तै भँडारेघाटसम्म पछ्याएको डन समूहले घेराबन्दीमा पारेर
कामदारको रकम लिएको उपभोक्ता समितिका एक सदस्यले बताए । उनका अनुसार डनले
उपभोक्ता समितिलाई मङ्गलबारदेखि बिहीबार बिहानसम्म घेराबन्दीमा पारेर रकम
लिएका हुन् ।
उपभोक्ता समितिका अध्यक्ष लालबहादुर राई
सम्पर्कबाहिर छन् । स्वीस सरकार र नेपाल सरकारको लगानीमा निर्माणाधीन सडकमा
काम गर्ने एक हजार ४० जना कामदारमध्ये १ सय २० जनाले ज्याला नपाएको
जानकारी आएपछि बिहीबार जिल्ला विकास समितिले उपभोक्ता समितिलाई कारण देखाऊ
पत्र पठाएको छ ।
