काठमाडौं, पौष २८ । विपक्षी दलहरुले राजनीतिक गतिरोध कायम राख्ने
षड्यन्त्रमा एकीकृत माओवादी लागेको भन्दै आन्दोलनका लागि एकसाथ अघि बढ्न
सहमत भएका छन् । एकीकृत माओवादी छलछामको राजनीति गरी सत्ताकब्जाको
प्रयासमा लागेको आरोप लगाउँदै विघटित संविधानसभामा रहेका १२ वटा विपक्षी
दलहरुले सरकार विरुद्ध आन्दोलनमा जाने रणनीति बनाएका हुन् ।आज साँझ बानेश्वरमा बसेको बैठकमा सहमतिको सरकार गठन प्रयास र नेपाली कांग्रेसका सभापति सुशील कोइरालालाई प्रधानमन्त्री बनाउने रणनीतिबारे पनि छलफल भएको थियो । माघ १ गतेसम्ममा एकीकृत माओवादी सहमतिमा नआए सरकार विरुद्ध आन्दोलनमा जानेबारेमा विपक्षी दलहरुले तयारी शुरु गर्ने भएका छन् ।
बैठकमा कांग्रेस, एमाले, उपेन्द्र यादव नेतृत्वको मधेशी जनअधिकार फोरमसहितका दलहरु सहभागी थिए ।
आजै विहान कांग्रेस सभापति सुशील कोइरालाको निवासमा भएको कांग्रेस र एमालेका शीर्ष नेताको बैठकमा दुबै दलका प्रधानमन्त्रीको उम्मेदवार कांग्रेस सभापति सुशील कोइराला नै भएकोमा एकमत जाहेर गरिएको थियो ।
एकीकृत माओवादीले कोइरालाको नेतृत्व नस्वीकार्ने बताएपछि एमालेमा तेस्रो विकल्पको खोजी शुरु गरेको खबर सार्वजनिक भइरहेको बेला दुबै दलले आफूहरुको उम्मेद्वार कोइराला नै भएको दोहो¥याएका छन् ।
